uupo
pupwesto
bubuo ng bilog na hugis
maatasan ang isa
na syang taga buhos ng inumin
na tila bagang tantyado ang sukat
iikot ang baso
iikot ang usapan
aalingawngaw ang tawanan
paulit-ulit ang paksa
mga balik-tanaw sa nakaraan
sa kabataan at kahapon
kamakailang beses dadaan ang baso
may ilan na pipiliin munang sumablay
may ilan naman na handang sumalo ng tagay
sa grupo may mahilig bumida ng kwento
may suki ng asar at biro
may tahimik na tumatawa lang sa sulok
eto ang isa sa mga paborito kong sandali
sa aking paningin, tumatakbo nang marahan ang oras
habang pinagmamasdan ko ang bawat isa
naanino ko ang saya at kung gaano na katagal ang pagsasama
kinukunan ko ng larawan sa aking isipan ang kanilang mga ngiti
at isinisilid ko sa aking memorya ang mga kwento
eto ang mga sandaling walang bahid ng pagkukunwari
ang bawat isa ay masaya
ang bawat isa ay totoo
isang magandang baon para bukas
na syang magtuturo sa'yo kung saan ka babalik at tutungo
ang mga tao at kwentong tatatak sa iyong pagkatao
...at ipapasa muli ang baso
0 comments:
Post a Comment